Su sàbudu cuìndixi de su mesi de onnisanti c’est istèttia me in Ussaramanna, organizzada de su Cumunu, sa cuarta ‘giornata della vita’. In custa festa benit prantada una matta de frutta po dònnia pippiu e pippia chi nascit in s’annu e una matta de ollastu po donnia persona chi fait norant’annus. A is dexi de amengianu in su ‘Parco della Continuità’, accanta a sa cresia de Santu Larenzu, si funt agattaus is cincu pipius Alice e Ilaria Podda, Luca Mura, Carola Schirru e Nicolò Schirru, nascius da onnisanti de occannu passau a oi cun is babbus, mamas, nonnas e nonnus; e tzia Tillia Serpi, s’unica soramannesa a ai fattu norant’annus occannu, cun su fillu, sa filla e su ènneru.
A sa presèntzia puru de is picioccheddus de is iscollas materna e media cun is maistus insoru, aintru a sa cresia de Santu Larenzu, don Marco Pianu, parrocu de Ussaramanna, at salludau a tzia Tillia, a is cincu pippius e a tottus is presentis. At nau poi dus fueddus su Sìndigu Giovanna Carletti, chi at bòffiu fai presenti a is picioccheddus sa fortuna chi tenint de podi studiai, arregodendi is fueddus de tzia Tillia chi sèmpiri at lastimau su no ai pòtziu studiai candu fut piciocchedda, poita fiant una famìglia troppu pòbera.

Su Sìndigu poi at liggiu is nomis de is personas chi tenint sa matta a nomi insoru giai prantada in su parcu; calincunu de i custus no est prus in vida.
Poi ananti a su parcu, don Marcu at benedixiu is mattixeddas chi dopu pagu momentus funt stettias prantadas.