Occannu puru, gratzias a s’impignu forti de s’Associatzioni culturali Teatro Marmilla de Ussaramanna cun s’axudu e sa collaboratzioni de su Comunu de Ussaramanna, de sa Provincia de su Campidanu de Mesu e de su Cunsòrtziu Turisticu Sa Corona Arrubia, s’istadi soramannesa fueddat sardu.

Me in sa pratza de sa Domu Zedda de Ussaramanna, de su 5 de axrobas a su 12 de austu - sèmpiri a is dexi de amerì - c’at a essi sa segunda Rassigna Teatrali in lingua Sarda. Po unu mesi e prus 10 cumpangias teatralis s’ant a esibì asuba su palcu.

At a inghitzai domigu 5 de axrobas sa Filodrammatica Guspinesa cun sa cummèdia “Su traballu in sa mena”.

Custas is atras cummèdias chi ant a essi affiguradas:

• sàbudu 11 de axrobas Teatro Tragodia de Mòguru - “Sa domanda”;
• domigu 12 de axrobas Associatzioni Culturali La Forgia de Muravera – “Mendula marigosa”;
• sàbudu 18 de axrobas Gruppu Teatrali S. Giovanni Suergiu – “Su quintu pianu”;
• domigu 19 de axrobas Joseph Theatrum de Cabuterra – “Bruscerias”;
• giòbia 25 de axrobas Associatzioni Culturali Filodrammatica Barumini – “Annetta e Pineddu”;
• cenàbara 26 de axrobas Cumpangia teatrali Amentos e Bisos de Ardauli – “Su Poberu allavanzau”;
• sàbudu 1 austu Cumpangia teatrali Su Fazzoni de Arbus – “Certus in famiglia”;
• domigu 2 austu Cumpangia teatrali Su Stentu de Serramanna – “Una bella idea”.

S’inserrada de sa rassigna at a essi fatta de S’Associatzioni culturali Teatro Marmilla de Ussaramanna cun sa cummèdia “Tziu Giuanni Cabua” su mèrcuis 12 austu.