PO SA SERRADA DE SA RASSIGNA TEATRALI

A nisciunus est donau de ascurtai sa boxi sua candu fueddat però a tottus est sutzèdiu assumancu una borta de ghettai unu tzèrriu in peis de unu monti candu su bentu no movit una folla e pustis de unu pagu de silentziu t’intendis custa boxi cumenti e chi t’arraspundat unu atru. Si provat in cussus momentus unu prexeri chi no si podit esprimi in fueddus.
Occannu puru, a Ussaramanna, eus tentu sa sorti de ospitai po cincui sabudus e domigus custa bella rassigna teatrali. Funtis benius a bidda nostra su mellus de is gruppus presentis in Sardigna. Ant rappresentau operas chi esprimint sa cultura sarda, presentadas de artistas berus. Eus ammirau s’impignu chi tottus ant postu e is sacrificius chi faint po donai cun amori a sa genti chi si seit comoda po passai unu mesi de allirghia.
Nos seus cussus chi ascurtant in silentziu; chi chistionant scetti tzaccarrendu is manus. Scipiàis, amigus carus benìus de Guspini, Moguru, Ardauli, Barumini, Serramanna, Cabuterra, Muravera, Arbus, S. Giovanni Suergiu ca in cussu tzaccarramanu si obeus esprimi tottu sa cuntentesa nosta po su sforzu chi fadeis recuperendi e proponendi sa cultura de tottus is sardus. Is vicendas de sa vida, bortas medas dolorosas, presentadas cun grandu sensu de sana ironia, tottu po fai a cumprendi ca is cosas prus sèrias chi bortas medas faint perdi sa paxi, bidas de su versu giustu faint arrì a nos etotu.
Su beffiànu est su personaggiu chi si sarvat sèmpiri de sa tristesa chi portat a sa depressioni; e ddu scideus tottus ca candu si sgonfiant is arrodas fadeus sonu malu.
Pigai, carus amigus, custus fueddus, cumenti sa boxi de su silèntziu chi si torrat po si nai ca s’eus ascurtau, ammirau e si naraus: gratzie! Augurendisì chi torrèis s’annu chi benit puru; e augurendi chi su chi fadèis siat pigau po esempiu po is talentus chi funt cuàus e potzant agattai sa forza e su coraggiu de no essi scetti spettadoris.
Tottus, in sa manera o s’atra, podeus fai calincuna cosa... po nos e po is atrus.
Unu ringratziamentu ancora po su gruppu de domu, Teatru Marmilla; issus faint sa serrada. Speraus chi siais cumenti si narat, “sa ceresiedda asuba de sa trutta”.
Allabaus po primu su promotori Ignatziu Atzei: est cumenti a su pedrusemi, in donnia logu. Mancu mali ch’est minudeddu!
Allabaus no de mancu su gruppu chi ormai ddus tenèus carus cumenti chi siant tottus soramannesus.
Gratzias, gratzias a tottus! E sighei cun s’incura chi eis tentu fintzas a oi. Su chi fadeis fait onori a bosàterus, e seis su bantu po tottu sa Marmilla
Michele Lilliu