Is primus dis de su mes’e onnisanti at fattu norant’annus tzia Tillia Serpi, una femina ussaramannesa ca tenit su donu de scri poesias e contus de vida passada.
Issa at bofiu arregalai a sa comunidadi cosa sua is componimentus suus chi su Cumunu at pubricau me in su liburu A piedi scalzi su una terra di vetro, chi est istettiu presentau su sexi de su mes’e onnisanti.

 Pensaus chi siat cosa agradessia a osaturus chi seis abbisitendi su situ de s’Uficiu Lingua Sarda de ndi podi ligi calincunu arrogu.

“… Insaras fiaus mabi postus: butus, mabi bistìus, pottaiàus priogu, iscrutzus, no teniàus sa luxi, fiàus a candeba de ollu e de pratòliu; in su ierru a fogu ‘e palla ‘e fà, si setziàus in su foxibi ingiriàus a sa forredda, s’ ‘omu prena de fumu, però, mancài fiaus accanta ‘e su fogu teniàus sèmpiri frìus poita ca s’ ‘omu fut troppu bècia, is crabatturas tottus furriàdas a fundu ‘e susu de is pisittus e no ddas podìant arrangiài ca no tenìant dinai…” (Clotilde Serpi, A piedi scalzi su una terra di vetro, p. 18.)

“… poita in su ierru insaras proìat meda e is terras fiant prenas de akua, no ci ‘iat bonificas, ci fiant is paulis …” (Clotilde Serpi, A piedi scalzi su una terra di vetro, p. 17.)

Ussaramanna est sa bidda mia

Ussaramanna est sa bidda mia
Mancai siat pitia
E custu est veramenti
Est onesta e brava sa genti,
Ma ci ‘nd’est meda de emigraus
Ca no ci fiat traballu e si ‘ndi funt andaus
Mancai afannaus.
Bènint medas annus
Po biri pitìus e mannus,
E a nos si donat cuntentu;
Tòrrant po Santu Lorenzu
Ca est sa festa prus manna
Po biri a babbu e a mama
E a totu sa parentela.
Sa cosa est meda bella
A ddus torrai a imprassai.
Sa cosa de traballai
Depiat èssiri innoi,
In totu sa Regioni.
Po no dèpiri emigrai
Tottus depeus pregai
A Deus, babbu eternu,
Chi illùminit su guvernu,
E boghint cosa de fai
E si ‘ndi fatzat torrai
A traballai innoi,
Po bivi acanta de pari
In unioni, paxi e libertadi.

(Clotilde Serpi, A piedi scalzi su una terra di vetro, p. 72.)